گزشتہ روز آسٹریلیا نے افغانستان کو شکست دیتے ہوئے پاکستان کی سیمی فائنل کی راہ ہموار کر دی ہے لیکن ایک چیلنج ابھی باقی ہے اور ٹیم فی الحال اگر مگر کا شکار ہے لیکن پاکستانیوں کیلئے حوصلہ افزاءخبر یہ ہے کہ کل نیوزی لینڈ اور سری لنکا کے درمیان ہونے والا میچ بارش کے باعث متاثر بھی ہو سکتا ہے ، محکمہ موسمیات کی جانب سے بنگلورو میں اگلے تین روز کیلئے بارشوں کا الرٹ جاری کر دیا گیا ہے۔
تفصیلات کے مطابق کل بنگلورو میں بارش کی قوی پیشگوئی ہے جو کہ میچ کے راستے میں رکاوٹ بھی بن سکتی ہے ۔بی بی سی کی رپورٹ کے مطابق کل بنگلورو میں سہ پہر میں بارش کے 67 فیصد امکانات ہیں جبکہ شام میں بارش کے امکانات 47 فیصد ہیں ،سہ پہر میں ممکنہ طور پر طوفانی بارش بھی ہو سکتی ہے جو کہ پہلی اننگ کیلئے دوران کھیل کو متاثر کر سکتی ہے ۔
اگر نیوزی لینڈ اور سری لنکا کے درمیان ہونے والا میچ بارش کا شکار ہو جاتاہے تو دونوں ٹیموں کو ایک ایک پوائنٹ دیدیا جائے گا اور پاکستان کو صرف انگلینڈ کو شکست دینا ہوگی۔
کل کا میچ پاکستان اور نیوزی لینڈ دونوں کیلئے اہم ہو گا ، کل نیوزی لینڈ اور سری لنکا کے درمیان ہونے والا میچ پاکستان کی سیمی فائنل میں رسائی سے متعلق اہم کردارادا کرے گا ،اگر کل کا میچ مکمل ہوتا ہے اور سری لنکا ، نیوزی لینڈ کو شکست دے دیتا ہے تو پاکستان کا راستہ سیمی فائنل کیلئے صاف ہو جائے گا اور بس پاکستان کو انگلینڈ کو 11 نومبر کو شکست دینا ہو گی
دوسری صورت میں اگر نیوزی لینڈ صرف ایک سکور سے سری لنکا کو ہراتا ہے تو پاکستان کو انگلینڈ کو 130 رنز سے شکست دینا ہو گی اور رن ریٹ بہتر ہونے پر آگے جا سکے گا ۔اگر میچ کھیلا جاتاہے اور نیوزی لینڈ سری لنکا کو 50 رنز سے شکست دیتا ہے تو پاکستان کو انگلینڈ کو 180 رنز سے ہرانا ہو گا ورنہ گھر کی پرواز پکڑنی ہو گی۔
