پاکستانی ٹیم کے ورلڈ کپ میں جیت کے کتنے چانسز ہیں ؟ ناصر حسین اور این مورگن نے اہم پیشگوئی کر دی
پاکستانی ٹیم کے ورلڈ کپ میں جیت کے کتنے چانسز ہیں ؟ انگلینڈ کرکٹ ٹیم کے 2سابق کپتانوں ناصر حسین اور این مورگن نے اہم پیشگوئی کر دی۔ “جیو نیوز ” کے مطابق انگلینڈ کرکٹ ٹیم کے سابق کپتان ناصر حسین نے کہا ہےکہ پاکستان آئی سی سی ٹورنامنٹس میں ہمیشہ ایک بڑی ٹیم ہوتی ہے، پاکستان ٹیم کچھ بھی کرسکتی ہے، ایک دن پاکستان ٹیم بالکل نیچے ہوگی تو اگلے روز وہ سب کو آؤٹ کلاس کردے گی۔پاکستان کے ورلڈکپ چانسز کا انحصار ان کے فاسٹ بولرز کی فٹنس پر ہوگا، اس وقت ان کے 3 اہم ترین پیسرز میں سے شاہین آفریدی فٹ ہیں جب کہ حارث رؤف اور نسیم شاہ کے ساتھ مسائل ہیں، اس لیے ان 3 بولرز کی موجودگی پاکستان کو ایک خطرناک ٹیم بنائے گی، ون ڈے کرکٹ میں سب سے اہم کردار وکٹ لینے والے بولرز کا ہوتا ہے۔
ناصر حسین کا مزید کہنا تھا کہ بابر اعظم نمبر ون بیٹر ہیں جب کہ فخر زمان آؤٹ آف فارم ضرور ہیں مگر ٹاپ آرڈر میں کافی اہم ہیں، پاکستان کے لیے تشویش کی بات ان کے سپنرز کا فارم میں نہ ہونا ہے۔
دوسری جانب سابق انگلش کپتان این مورگن نے کہا کہ پاکستان کو یہ طے کرنا ہوگا کہ جو سری لنکا میں کیا ویسا آئندہ نہیں کرنا ہے، بظاہر پاکستان کرکٹ ٹیم ایک بیلنسڈ سائیڈ ہے۔ پاکستان کرکٹ ٹیم میں بلاشبہ ایک اچھی ٹیم کی کشش موجود ہے، حال ہی کے نتائج پاکستان کے لیے سبق آموز رہیں گے۔
