ایشیاءکپ میں پاک بھارت میچ کیلئے اضافی دن کیوں دیا گیا ؟ یہ کسی ٹیم کیلئے نہیں کیا گیا بلکہ ۔۔ اندرونی حقیقت سامنے آ گئی
ایشیاءکپ سپر فور مرحلے میں پاکستان اور بھارت کے درمیان ہونے والے میچ کیلئے اضافی دن دیا گیا جس پر دیگر ٹیموں نے بھی تحفظات کا اظہار کیا لیکن اس کے پیچھے کی وجہ انتہائی حیران کن ہے جو کہ اب سامنے آ چکی ہے ۔
ایشیاکپ کے گروپ اسٹیج میچ میں پاکستان اور بھارت کا مقابلہ بارش کی وجہ سے ادھورا رہ جانے پر گروپ 4 مرحلے کے میچ کیلئے ریزرو ڈے رکھنے کا فیصلہ کیا گیا جس پر سری لنکن اور بنگلہ دیشی کوچز کی جانب سے اعتراض بھی سامنے آیا،ان کا کہنا تھا کہ روایتی حریفوں کا مقابلہ مکمل ہوا تو ان میں سے کسی ایک کو 2پوائنٹس ملیں گے،دوسری جانب دیگر ٹیموں کی میچ بارش کی نذر ہوئے تو ایک ایک پوائنٹ حاصل ہوگا۔
ایک رپورٹ میں نشریات کی انڈسٹری سے تعلق رکھنے والے ذرائع کا کہنا ہے کہ براڈ کاسٹر نے ایشیا کپ کے حقوق 4کروڑ امریکی ڈالر کے عوض حاصل کیے ہیں،ان میں سے 3کروڑ 80لاکھ صرف پاکستان اور بھارت کے مقابلوں کے ہیں،زیادہ رقم سپر 4اور روایتی حریفوں کے ممکنہ فائنل سے ہونے کی توقع ہوتی ہے، اس لیے ایونٹ کے مالی استحکام کیلئے پاک، بھارت میچز ہی سب سے زیادہ اہمیت رکھتے ہیں،انٹرنیشنل ٹی ٹوئنٹی لیگز کی بہتات میں ریزرو ڈے سمیت یا اس کے بغیر براڈ کاسٹرز کیلئے روایتی حریفوں کے مقابلوں سے بڑی کوئی پراپرٹی نہیں۔
ذرائع کے مطابق کولمبو میں بارش کے پیش نظر خدشات ضرور تھے مگر ہمبنٹوٹا کو متبادل وینیو بنانے کی تجویز کبھی ایشین کرکٹ کونسل کے زیر غور نہیں آئی،لاجسٹک ضروریات اور براڈ کاسٹنگ سمیت دیگر معاملات کیلیے کولمبو میں مقابلوں کا انعقاد ہی بہتر انتخاب تھا۔
